30-31-nji Türkmenistanyň paýtagtynda geçiriljek Energetika Hartiýasynyň mejlisinde energiýa serişdelerini üstaşyr geçirmek boýunça köptaraplaýyn çarçuwaly ylalaşygy işläp düzmegiň meseleleri jikme-jik maslahatlaşylar. Bu barada Energetika Hartiýasynyň sekretariatynyň baş geňeşçisi Hose Alehandro Karbalýo Leýda «Awazada» geçirilen Halkara gaz kongresinde eden çykyşynda aýtdy.
Bu forumyň maksatnamasyna «Tebigy gazyň serhedüsti iberilmegi we üstaşyr geçirilmegi», «Ählumumy energetiki howpsuzlykda suwuklandyrylan tebigy gazyň orny», «Nebitiň dünýä bazarlaryna çykarylmagy», «Elektrik energiýasynyň serhedüsti söwdasy we durnukly ösüş» temalar boýunça mejlisler giriziler.
Türkmenistanyň Energetika Hartiýasynyň maslahatyna başlyklygynyň çäklerinde energiýa akymlarynyň köp görnüşliligini üpjün etmek, olaryň geografiýasyny giňeltmek, energiýa netijelilik we energiýa tygşytlylyk, innowasiýalary ornaşdyrmak, ekologiki nukdaýnazar we energiýanyň dikeldilýän çeşmeleri, energiýa geçirijilerini deňhukuly, adalatly esasda halkara üstaşyr geçirmegiň ygtybarlylygy we howpsuzlygy, maýa goýumlaryň netijeliligini ýokarlandyrmak we olary goramak ýaly ileri tutulýan ugurlara aýratyn üns berler.
Aşgabatda 31-nji maýda şeýle hem energiýa geçirijilerini ygtybarly we durnukly üstaşyr geçirmek boýunça bilermenleriň bäşinji halkara duşuşygy geçiriler. Öň resmi Aşgabat BMG-niň çäklerinde öndüriji-ýurtlaryň bolşy ýaly, üstaşyr geçiriji we gazy sarp ediji ýurtlaryň hem bähbitlerini nazara almak bilen halkara energetika infrastrukturasynyň ygtybarly we howpsuz hereket etmegini üpjün etmek boýunça uniwersal mehanizmleri işläp düzmeklige girişmegi teklip etdi.
Gaz ätiýaçlyklary boýunça dünýäde dördünji orny eýeleýän Türkmenistan Hazar we Merkezi Aziýa sebitinde gaz bazarynda möhüm orny eýeleýär. Häzirki wagtda türkmen tebigy gazy Hytaýa we Eýrana eksport edilýär. 2020-nji ýylda Türkmenistan-Owganystan-Pakistan-Hindistan gaz geçirijisini işe girizmek meýilleşdirilýär. Şeýle hem türkmen energiýa geçirijilerini Ýewropa bazarlaryna çykarmaklygyň mümkinçilikleri maslahatlaşylýar.