Mary şäherindäki Türkmen döwlet energetika institutynyň gurluşynda metallary işläp taýýarlamak boýunça tehnologik okuw merkezi peýda boldy. Senagat-tehnologiýasy fakultetiniň mugallymy Gözel Saparlyýewanyň aýtmagyna görä, onuň binýadynda „metallary işläp taýýarlamak maşynlary we tehnologiýalary“ hünäriniň talyplary bilim alarlar.
Merkez aýry okuw-önümçilik binasynda ýerleşýär. Ýagtydan giň okuw otaglary dünýäniň öňdebaryjy firmalarynyň öndürýän tokarçylyk enjamlary, güýçli gidrawliki press, giýotin gaýçylary diýilýäni we beýleki gurallar bilen üpjün edilen. Merkezi enjamlaşdyrmaga hindi hünärmenleri uly ýardam berdiler. Täze enjam sapaklarda synagdan üstünlikli geçdi.