Aşgabat stadionynda Talyp sporty we Ahal toparlarynyň duşuşygy bilen ýokary ligadaky toparlaryň arasyndaky Türkmenistanyň çempionatynyň ikinji tapgyry başlandy.
Toparlaryň ikisi hem milli birinjilikde ilkinji oýunda ýeňiş gazanyp bilmedi. Birinji tapgyrda Talyp sporty ýurdumyzyň häzirki çempiony bolan Halkara türkmen-türk uniwersitetiniň futbolçylary bilen 0:0 hasabynda deňme-deň oýnadylar. Türkmenistanyň Naýbaşy kubogynyň eýesi Ahal topary myhmançylykda Marynyň Merw toparyndan 1:3 hasabynda utuldy. Şoňa görä-de, bäsdeşler şu günki duşuşykda ýeňiş gazanmaga hem-de janköýerlerini begendirmäge çalyşdylar.
Ahal toparynyň oýunçylary duşuşygyň ilkinji pursatlaryndan hüjüme geçip, eýýäm oýnuň 3-nji minutynda onuň hüjümçisi G.Çonkaýew dürs urgy bilen hasaby açdy. Şondan ýarym sagat geçenden soň tomaşaçylar Talyp sportunyň derwezesine ýene-de bir pökgüniň geçirilmeginiň şaýatlary boldular. Bu gezek jerime meýdançasynyň daşyndan dürs urgy bilen R.Şermetow tapawutlanmagy başardy.
Oýnuň ikinji ýarymynda toparlaryň ikisi hem hasaby üýtgetmäge çalyşdylar. Ýöne derwezebanlaryň ussatlyk gorkezmegi netijesinde hasap üýtgemedi. Şeýlelikde, Ahal topary ýeňiş gazanyp, ilkinji 3 utugyna eýe boldy.
Ýurdumyzyň birinjiliginiň ikinji tapgyry 15-nji martda Şagadam Merw, Bagtyýarlyk-Lebap Aşgabat, Daşoguz Altyn asyr we HTTU Balkan toparlarynyň duşuşyklary bilen tamamlanar.