Astananyň Komfort myhmanhanasynyň maslahatlar zalynda Türkmenistanyň Hemişelik Bitaraplygy parahatçylygyň, durnukly ösüşiň we abadançylygyň strategiýasydyr atly halkara ylmy-amaly maslahat geçirildi.
Bu çäre Gazagystanyň Nur Otan partiýasynyň maglumat-wagyz toparynyň ýardam bermeginde Türkmenistanyň Gazagystan Respublikasyndaky Ilçihanasy tarapyndan gurnaldy. Maslahatyň işine Türkmenistanyň Mejlisiniň, Gazagystanyň Mažilisiniň Parlamentiniň deputatlary, diplomatik korpusynyň wekilleri, syýasatşynaslar, alymlar, jemgyýetçilik işgärleri we talyplar gatnaşdylar.
Maslahatyň çäklerinde şeýle-de çärä gatnaşyjylarda uly gyzyklanma döreden türkmen ýazyjy-şahyrlarynyň kitaplarynyň, türkmen halylarynyň we haly önümleriniň sergisi guraldy.
Maslahatyň açylyş dabarasynda Türkmenistanyň Mejlisiniň Başlygynyň orunbasary G.Baýramowa, Gazagystanyň Mažilisiniň Parlamentiniň deputaty K.Burhanow we Türkmenistanyň Gazagystan Respublikasyndaky Adatdan daşary we Doly Ygtyýarly Ilçisi M.Akmyradow dagylar çykyş etdiler.
Maslahatda çykyş edenler Türkmenistanyň bitaraplyk derejesiniň talaplaryna eýermegiň 20-ýyllyk tejribesi, bitaraplygyň taryhy we ösüşi barada hem-de Merkezi Aziýa sebitinde durnuklylygy saklamakda Türkmenistanyň bitaraplyk derejesiniň oňyn täsiri barada gürrüň etdiler.
Olar öz çykyşlarynda Türkmenistan öz döwlet garaşsyzlygyny alandan soň, özeninde parahatçylyksöýüjilik, hoşniýetli goňşuçylyk, hemme ýurtlar we halklar bilen hemmetaraplaýyn hyzmatdaşlyk etmek ýaly ýörelgelere daýanýan ýurduň daşary syýasy strategiýasyny işläp taýýarlady diýip bellediler.
Çäräniň soňunda maslahata gatnaşyjylar we myhmanlar gurnaýjylaryň adyna özleriniň minnetdarlyk sözlerini aýtdylar.