«Daşoguzgazüpjünçilik» we «Daşoguzgazçykaryş» müdirlikleriniň işgärleri ýakynda «Daşoguz» şypahanasynda dynç alyş we beden saglygyň dikeltmegiň şertleri bilen tanyşmaga mümkinçilik aldylar. Bu ýerde dynç alýan gazçylaryň gürrüň bermegine görä, şypahananyň işgärleri olary ýyly mähir bilen garşy alyp, iň esasysy hem, birnäçe hroniki keselleriň öňüni almak boýunça bejergileri almaga ýardam edipdirler.
«Daşoguz» şypahanasy 2014-nji ýylda ulanyşa girizildi. Şypahana 200 sany adamy ýerleşdirmäge we hyzmat etmäge niýetlenendir. Giň otaglarda amatly şertler döredilipdir. Şypahananyň fitnes-zaly häzirki zaman trenažýorlary bilen üpjün edilipdir. Bu ýerde dynç almaga gelenler tennis we billiýard oýnamak üçin sport zallaryna, woleýbol we basketbol meýdançalaryna baryp görüp bilýärler. Şypahananyň müşderileriniň ygtyýarynda şeýle hem iki sany fito-bar bar. Ol ýerde melhem çaýlary taýýarlanylýar.
Şypahananyň bejeriş bölüminde bejergi bermegiň häzirki zaman we netijeli usullary, şol sanda palçyk arkaly bejergi, fizioterapiýa, bejeriş maşklary, agyrylary azaltmak üçin organlary ýa-da derini sowuk arkaly bejermek, duzlar we minerallar bilen baýlaşdyrylan howa arkaly bejergi, ozon howasy bilen bejergi, yslaryň peýdaly aýratynlyklaryny peýdalanmak arkaly bejergi, SPA kapsula, oňurgany bejermek hyzmaty bar.
Şypahanada Germaniýanyň, Beýik Britaniýanyň, Slowakiýanyň, Italiýanyň we Ýaponiýanyň öňdebaryjy önüm öndürijileriniň lukmançylyk tehnikasy ornaşdyrylypdyr.
Türkmenistanyň demirgazygynda ýerleşen «Daşoguz» şypahanasy ýokary hilli dynç alşy we saglygyň berkidilmegini kepillendirýär. Özboluşly mikroklimaty, tebigy çeşme, häzirki zaman lukmançylyk tehnikalary we ýokary hünär taýýarlykly hünärmenler — bu şypahananyň üstünliginiň girewidir.
Çeşme: oilgas.gov.tm