Türkmen oba hojalyk institutynyň binýadynda “teoretiki mehanika”, “materiallaryň garşylyk görkezmegi”, “ykdysadyýet”, “statistika”, “ekologiýa”, “informatika” ugurlary boýunça halkara talyplar internet-olimpiadasynyň ikinji (jemleýji) tapgyry geçirildi.
Russiýa Federasiýasynyň Bilim ulgamyny goldamak baradaky milli gaznasy tarapyndan geçirilen intellektual ýaryşlara Russiýa Federasiýasynyň, Ermenistanyň, Belarus Respublikasynyň, Gazagystan Respublikasynyň, Gyrgyzystan Respublikasynyň, Täjigistan Respublikasynyň, Sloweniýanyň, Özbegistan Respublikasynyň ýokary okuw mekdepleriniň we şahamçalarynyň 215-sinden talyplaryň 2 müň 299-sy gatnaşdy. Bu bäsleşige biziň ýurdumyzyň ýokary okuw mekdepleriniň ikisinden TOHI we Türkmen döwlet energetika institutyndan talyplar gatnaşdylar.
Olimpiada onlaýn düzgünine laýyklykda kompýuter testleşdirme görnüşinde geçirildi. Seans tamamlanan badyna ýerine ýetirilen işler Ýoşkar-Ola şäherine – YGI gelip gowuşdy. Eýýäm iki sagatdan soňra bolas netijeler yglan edildi.
Internet-olimpiadanyň netijeleri boýunça Türkmenistanyň talyplary altyn medallaryň 11-ne, kümüş medallaryň 19-na we bürünç medallaryň 27-ne mynasyp boldular. Teoretiki mehanika ugry boýunça bir “altyn”, üç “kümüş” we iki “bürünç”, materiallaryň garşylyk görkezmegi iki “bürünç”, ykdysadyýet bir “kümüş”, ekologiýa alty altyn, 11 kümüş we 15 bürünç medallary, informatika dört altyn, dört kümüş we sekiz sany bürünç medallary topladylar.
Türkmen oba hojalyk institutynyň okuw binýady halkara standartlaryna doly laýyk gelýär. Halkara olimpiadasyna düýpli taýýarlyklary görmekleri maksady bilen, talyplara profil ugurlar boýunça okuw materiallaryny çuňlaşdyryp öwrenmekleri üçin ähli mümkinçilikler döredildi. Internete birikdirilen elektron kitaphanasy olaryň hyzmatynda boldy.