Çöller, ösümlik we haýwanat dünýäsi milli institutynda Menzbir ornitologik jemgyýetiniň (MOJ) Orta Aziýa bölüminiň mejlisi, ýagny “Rustamow okaýyşlary” geçirildi. Duşuşyklar 2007-nji ýyldan bäri her ýylyň dekabr aýynda gurnalýar. Bu duşuşyk geçen ýylda alnyp barlan ylmy işleriň netijesini, guşlaryň barlaglary boýunça täze maglumatlary, ornitofaunanyň seýrek duşýan görnüşleriniň monitoringi boýunça ylmy saparlaryň netijelerini ara alyp maslahatlaşmagy maksat edindi.
Çärä biolog-alymlar, ýokary okuw mekdepleriniň mugallymlary, bioköpdürlülik we guşlaryň goragy ulgamynyň bilermenleri, jemgyýetçilik ekologiýa guramalarynyň wekilleri, talyplar gatnaşdylar. Bioköpdürlüligi saklap galmak, “Gyzyl kitaba” girizilen guşlary we olaryň ýaşaýan mekanyny goramaklygy gowulandyrmak boýunça Türkmenistanyň alyp barýan halkara işi barada çykyşlar boldy. Ýurdumyzda ornitologiýanyň ösüş taryhy baradaky çykyşlaryň çäklerinde çäräniň guramaçylary bu ugurdan abraýly alymlaryň, şol sanda akademik E.K. Rustamowyň, professor G.P.Dementýewiň alyp baran işleri bilen tanyşdyrdylar.
Soňky iki ýylda ýurdumyzyň ornitologlary milli we Ramsar konwensiýasy taraplarynyň halkara ylmy maslahatlaryna, şeýle hem suw serişdelerinden rejeli peýdalanmaga, daşky gurşawy goramaga, aw serişdelerini durnukly ulanmak boýunça sebit işine we ýabany haýwanlary goramaga bagyşlanan forumlara gatnaşdylar.
Şu jähtden türkmen ekologlarynyň aýratyn goralýan ýerleri – döwlet tebigy goraghanalary we esasy ornitologik meýdanlary dolandyrmagy güýçlendirmek boýunça halkara maksatnamalary bilen hyzmatdaşlygy ara alnyp maslahatlaşyldy. Menzbir ornitologiýa jemgyýetiniň Beýik Britaniýanyň Guşlary goramak Şalyk jemgyýeti (RSPB) we Türkmenistanyň Tebigaty goramak jemgyýeti bilen üstünlikli özara hereketi nygtaldy.
Duşuşygyň çäklerinde RSPB-niň döreden guşlary goramak ulgamynda işleýän türkmenistanly ýaş alymlara Rustamow adyndaky baýragyny gowşurmak dabarasy boldy. Şu ýyl bu baýraga Lebap welaýatynyň Döwletli etraby boýunça guşlaryň muşdaklary we goragy jemgyýetiniň mekdebara jemgyýetçilik Klubynyň ýolbaşçysy Aziza Beşimowa mynasyp boldy.