Hanti-Mansiýskide geçirilýän 39-njy Bütindünýä küşt Olimpiadasynda Türkmenistanyň ýygyndy erkekler topary özüniň bäşinji ýeňşini gazandy.
Bu gezek biziň ildeşlerimiz Yragyň wekillerinden 3:1 hasabynda üstün çykdylar. Biziň toparymyzyň ýeňşini Mesgen Amanow, Maksat Atabaýew we Hanjar Ödäew üpjün etdiler. Olar degişlilikde 1-nji, 2-nji we 4-nji tagtalarda öz bäsdeşlerinden üstün çykdylar.
Şu ýeňişden soň türkmen küştçüleri 16 basgançak ýokary galdylar we 11 oçko topladylar. Munuň özi 31-44-nji orunlary paýlaşýan ondört toparyňkydan 1 oçko köpdür.
Türkmenistanyň zenanlar topary oýunlaryň 10-njy tapgyrynda erjel göreşde 1,5:2,5 hasabynda Norwegiýanyň toparyndan asgyn geldi. Biziň toparymyzda ýeke-täk ýeňşi 4-nji tagtada oýnan Aknur Isaýewa gazandy. Birinji tagtada oýnan halkara grossmeýsteri Mähri Geldiýewa bolsa öz oýnuny deňme-deň tamamlady.
Tamamlaýjy 11-nji tapgyrda Türkmenistanyň ýygyndy erkekler topary Zambiýanyň toparynyň garşysyna, zenanlar ýygyndy toparymyz bolsa Albaniýanyň küştçileriniň garşysyna oýnarlar.
referans: www.turkmenistan.gov.tm