Hökümetiň mejlisiniň barşynda Türkmenistanyň Prezidenti Gurbanguly Berdimuhamedow şu ýyl ilkinji gezek Türkmenistanyň taryhynda özüniň ýokary hili bilen meşhur bolan türkmen bugdaýyny dünýä bazarlaryna eksport etmek boýunça anyk mümkinçiligiň peýda bolandygyny habar berdi. Munuň özi täze oba hojalyk syýasatynyň üstünlikli durmuşa geçirilmegi netijesinde mümkin boldy. Şol syýasatyň esasyny bolsa oba hojalygyny döwlet tarapyndan goldamak, daýhanlaryň zähmetini höweslendirmek, ýurdumyzyň oba hojalyk alymlarynyň iň täze işläp taýýarlamalaryny ornaşdyrmak, bu ugurda dünýä ylmynyň öňde baryjy usullaryny ulanmak we beýleki oňyn ýörelgeler düzýär. Şeýlelikde, Türkmenistan azyklyk gallany eksport edýän ýurtlaryň hataryna girdi we özüniň ykdysady kuwwatyny pugtalandyrmak ýolunda ene-de bir möhüm ädim ätdi. Munuň özi onuň BMG-niň Müňýyllygyň Ösüş Maksatlarynda göz öňünde tutulan düýpli azyk howpsuzlygy meselelerini çözmäge gatnaşmagynyň ygtybarly esasy bolup durýar.
referans: www.turkmenistan.gov.tm