Türkmenistanyň Prezidenti Gurbanguly Berdimuhamedow Pakistan Yslam Respublikasynyň Adatdan daşary we Doly ygtyýarly ilçisi Murad Aşraf Janjuan bilen Aşgabatda duşuşygynda Türkmenistan-Owganystan-Pakistan-Hindistan (TOPH) transmilli gaz geçirijisiniň gurluşygynyň taslamasyny durmuşa geçirmegiň depginini mundan beýläk-de ýokarlandyrmagyň mümkinçiliklerini ara alnyp maslahatlaşdy.
Ilçi öz ýurdunyň TOPH transmilli gaz geçirijisiniň gurluşygyny çaltlaşdyrmaga uly gyzyklanma bildirýändigini tassyklap, bu turba geçirijiniň çekilmeginiň sebit hem-de ählumumy derejede ykdysady gatnaşyklaryň ösdürilmegine ýardam etjekdigine ynam bildirdi.
Diplomat Pakistana türkmen elektrik energiýasyny ibermek boýunça taslamanyň wajypdygyny hem belledi.
Prezident Gurbanguly Berdimuhamedow söhbetdeşligiň barşynda Türkmenistanyň sebit boýunça goňşy döwletler, hususan-da, Pakistan bilen netijeli hyzmatdaşlygy pugtalandyrmaga aýratyn gyzyklanma bildirýändigini nygtady. Türkmenistany Pakistan bilen çuňňur taryhy kökler, dost-doganlyk gatnaşyklary, medeniýetiň we däp-dessurlaryň umumylygy baglanyşdyrýar.
Duşuşygyň çäklerinde döwletara gatnaşyklarynyň möhüm meseleleri boýunça gyzyklanma bildirilip, pikir alşyldy. Ýokary derejede ýola goýlan türkmen-pakistan gatnaşyklary hem-de iki ýurduň halkara we sebit gün tertibiniň möhüm meseleleriniň birnäçesi boýunça garaýyşlarynyň ýakyndygy ýa-da gabat gelýändigi şol gatnaşyklaryň has-da pugtalandyrylmagyna ýardam edýär. Şunuň bilen baglylykda, Türkmenistanyň Prezidentiniň halkara ulag-üstaşyr geçelgelerini döretmäge we ählumumy energetika howpsuzlygyny üpjün etmäge degişli başlangyçlarynyň wajypdygy nygtaldy.
Duşuşygyň çäklerinde Prezident we ilçi söwda-ykdysady hyzmatdaşlygy ösdürmäge degişli meseleleri hem ara alyp maslahatlaşdylar.