Penşenbe güni Ahalteke kubogy ugrunda utulan çykdy usulynda iki tapgyrda geçiriljek özbaşdak we toparlaýyn ýaryş Ýapyk binalarda we söweş sungaty boýunça V Aziýa oýunlarynyň atly sporty (konkur) boýunça geçiriljek ýaryşlara badalga berer. Bu ýaryşa Türkmenistanyň meşhur tohum atlary hem gatnaşýar.
Ýaryş Aşgabadyň eteginde ýerleşýän, örän amatly şertleri bolan atçylyk sport toplumynda geçirilýär.
Toparlaýyn we özbaşdak görnüşler boýunça geçirilýän ýaryşlara öňden bäri gatnaşyp gelýän Saud Arabystanyň 4 sany güýçli toparynyň düzüminde şu ýylky dünýä türgenleriniň sanawynda 500-nji orunda duran 3 sany meşhur çapyksuwar hem bu ýaryşa gatnaşýarlar.
5 günüň dowamynda geçirilýän ýaryşlara dünýä türgenleriniň sanawynda 113-nji orny eýeleýän, London-2012 Olimpiýa oýunlarynda Saud Arabystanyň ýygyndysyna Olimpiýa oýunlarynda ilkinji gezek bürünç medaly gazandyran Abdullah Walid Al Şarbatly hem gatnaşýar.
Al Şarbatly 2010-njy ýylda ABŞ-nyň ştaty Kentukide geçirilen bütindünýä atçylyk sporty boýunça ýaryşyň özbaşdak görnüşinde kümüş medalyň, şeýle hem 2014-nji ýylda Inçhon şäherinde geçirilen Aziýa oýunlarynyň özbaşdak görnüşinde altyn medalyň we toparlaýyn görnüşde bolsa kümüş medalyň eýesi boldy.
Şeýle hem, bu toparda 4 sany Olimpiýa oýunlaryna gatnaşan, 2000-nji ýylda Sidneý şäherinde geçirilen ýaryşyň özbaşdak görnüşinde bürünç medaly eýelän ilkinji Saud arabystanly ussat çapyksuwar Halid Abdulaziz Aleid hem bar.
2014-nji ýylda geçirilen Aziýa oýunlarynda ýaryşyň toparlaýyn görnüşiniň ýeňijileri Katarly türgenler hem bu ýaryşa gatnaşýarlar. Olar Saud arabystanly we Siriýaly türgenleriň güýçli garşydaşlary bolup çykyş ederler.
2017-nji ýylyň 23-nji sentýabrynda şenbe güni atçylyk sporty boýunça medal gowşuryş dabarasy geçiriler.