Futbol boýunça Türkmenistanyň Kubogy ugrundaky 19-njy gezek geçirilýän bäsleşik pellehana ýakynlaşýar. Hormatly baýrak ugrunda bäsleşige badalga alan toparlaryň 15-sinden dördüsi bäsleşigi dowam etdirýärler.
Ilkinji 1/2 final ýaryşlary Aşgabatda we Balkanabatda geçirildi.
Paýtagtymyzyň «Dagdan» stadionynda Milli sport we syýahatçylyk institutynyň «Talyp sporty» topary Türkmenistanyň Kubogynyň eýesi «Altyn asyr» topary bilen duşuşdy.
Oýnuň ilkinji 20 minutynda «Talyp sporty» toparynda iki gezek hasaby açmak mümkinçiligi döredi. Ýöne birinji ýagdaýda pökgi derezäniň sütünine degip yza gaýtdy, ikinji ýagdaýda bolsa «Altyn asyryň» derwezeçisi öz toparyny halas etdi. Oýnuň 30-njy minutynda G.Çonkaýewiň takyk uran jerime urgusy bilen hasap açyldy – 1:0. Myhmanlaryň üstünligini oýnuň 57-nji minutynda R.Berdiýew berkitdi. Şeýlelikde, garşydaşyň meýdanynda ýeňiş gazanyp «Altyn asyr» bassyr ikinji gezek finala çykmaga mümkinçilik gazandy.
Milli birinjilik ugrunda beýleki ýarym final bäsleşiginde «Balkan» topary bilen ýurduň kubogynyň geçen ýyldaky finalçysy «Merwiň» futbolçylary duşuşdylar. Duşuşygyň ykbalyny «Balkanyň» düzüminde ilkinji gezek çykyş edýän «Altyn asyryň» ozalky hüjümçisi A.Mirzoýew çözdi. Ol oýnuň 56-njy minutynda ýakyn aralykdan yzyna gaýtaryp bolmajak urgy edip, pökgini tora saldy. Balkanabatlylar üçin finala çykmakda geçirilen ýeke-täk pökginiň ýeterlik boljakdygy Maryda geçiriljek jogap oýnunda mälim bolar.
Türkmenistanyň Kubogynyň-2010-njy ýyldaky eýesi noýabr aýynyň birinji on günlüginde belleli bolar.
referans: www.turkmenistan.gov.tm