Aşgabadyň atçylyk sport toplumynda ýazky möwsümiň nobatdaky at çapyşyklary geçirildi. Bu ýerde ahalteke bedewleriniň 93-si ýyndamlykda güýç synanyşdylar.
1000 metr aralykda bäsleşen 4-nji toparyň iki ýaşar bedewleriniň 11-si ýaryşy açdylar. Olaryň arasynda Dorsekil 2 bellenilen aralygy 1 minut 09,2 sekuntda geçip ýeňiş gazandy. “Behişdi bedewler” şeýle hem üçünji çapyşykda 1000 metr aralykda bäsleşdiler, şonda 10 atyň arasynda Altyn diýen bedew at tapawutlanmagy başardy (1 minut 10,4 sekunt).
Ikinji we dördünji çapyşyklarda 500 metr aralykda 12 ýaşdan 15 ýaşa çenli ýaş çapyksuwarlar 4-nji toparyň iki ýaşar bedewleriniň 22-sinde öz ukyp başarnyklaryny görkezdiler. Şonda G.Gelenow Altynaý diýen bedewinde (0,31. 3 sekunt) hem-de A.Agamyradow Dalbedew atly bedew atynda (0,32.1 sekunt) öňdäki orunlary eýelediler.
1500 metr aralykda geçirilen bäşinji çapyşykda 3-nji toparyň üç ýaşar bedewleriniň 12-siniň arasynda çekeleşikli bäsleşik boldy. Şonda Dorhan atly bedew at bellenilen aralygy 1 minut 47,0 sekuntda geçmegi başardy.
1400 metr aralykda geçirilen altynjy, ýedinji we sekizinji çapyşyklarda hem 3-nji toparyň üç ýaşar bedewleri güýç synanyşdylar. Bu ýaryşda Ahaloglan (1 minut 39,2 sekunt), Gojadag (1 minut 40,3 sekunt) we Myhman (1 minut 45,1 sekunt) ýeňiji boldylar.
4 ýaşar we şondan uly bedewler öz ýyndamlyklaryny 2000 metr aralykda geçirilen dokuzynjy çapyşykda görkezdiler we şonda Gulangul pellehana birinji bolup geldi (2 minut 28,0 sekunt).
referans:www.turkmenistan.gov.tm