Şu gün, 13-nji iýunda ýurdumyzyň futzal boýunça Naýbaşy ligasynyň 6-njy tapgyrynyň duşuşyklary geçirildi.
Bu tapgyrda ýaryş tertibiniň öňbaşçylary “Daýhanbank” bilen “Köpetdag” toparlary garşydaşlaryny ýeňlişe sezewar etdiler.
“Daýhanbank” topary “Senagatbankdan” 4:2 hasabynda üstün çykan bolsa, onda “Köpetdagyň” futzalçylary “Gümrükçiniň” derwezesinden jogapsyz toplaryň dördüsini geçirmegi başardylar.
Bu tapgyrdan soň toparlaryň ikisi-de 15 utuk topladylar, ýöne özaralaryndaky duşuşygyň netijesinde “Daýhanbank” ýaryş tertibinde birinji basgançagy eýeleýär.
Tapgyryň beýleki duşuşyklarynda “Deňizçi” bilen “Migrasiýa” 1:1 hasabynda deňme-deň oýnadylar. “Olimpden” 11:6 hasabynda üstün çykan “Serhetçi” bolsa çempionatdaky ilkinji ýeňşini baýram etdi.
Türkmen döwlet ykdysadyýet we dolandyryş institutynyň sport toplumynda dowam edýän Naýbaşy liganyň ýedinji tapgyry 15-nji iýunda geçiriler.
Çeşme: http://tff.com.tm/