Türkmenistanyň çempiony “Balkanyň” gatnaşmagynda Malaýziýada Aziýa futbol konfederasiýasynyň (AFK) prezidentiniň Kubogy ugrundaky ýaryşyň dowam edýän jemleýji oýunlarynda şu gün duşuşyklaryň ikinji tapgyry geçirildi.
Şol oýunlaryň ilkinjisinde AFK-nyň prezidentiniň Kubogy ugrundaky ýaryşa sekiz gezek gatnaşan we bu ýaryşyň 2006-njy hem-de 2007-nji ýyllardaky iki gezek ýeňijisi Gyrgyzystanyň “Dordoi” komandasy oýnuň iň soňky minutlarynda “Al Quds Hilal” (Palestina) komandasyndan 2:3 hasabynda ýeňildi.
Oýun gününiň ikinji duşuşygy “Erchim” (Mongoliýa) we “Three Star” (Nepal) toparlarynyň arasynda 1:1 hasabynda tamamlandy.
Şeýlelikde, iň soňky tapgyryň öň ýanynda “Balkan” “A” toparynda “Erchim” we “Three Star” komandalaryndan 2 utuk artykmaçlyk bilen ynamly öňde barýar. Topardaky jemleýji duşuşygyny türkmen futbolçylary 27-nji sentýabrda “Erchim” komandasy bilen geçirer. Biziň watandaşlarymyzyň finala çykmagy üçin bu duşuşygyň deňme-deň tamamlanmagy hem ýeterlikdir.
Bu ýaryşyň beýleki bir finalçysy şol gün “B” toparynyň ýeňijileriniň–“Al Quds Hilal” (Palestina) we “KRL Football Club” (Pakistan) komandalarynyň duşuşygynda kesgitlener.