Aşgabat, 23-nji oktýabr. Jaý toýlary we täze desgalaryň açylyş dabaralary baýramçylygyň asylly däbine öwrüldi. Şu gün milli senenamanyň baş baýramçylygynyň—Türkmenistanyň garaşsyzlygynyň 19 ýyllygynyň öňüsyrasynda türkmen paýtagtynda ýokary amatlykly jaýlaryň birnäçesi we söwda merkezleriniň bäşisi öz gapylaryny giňden açdylar. Ir ertirden şäheriň dürli künjeklerinde täze Galkynyş eýýamynda ýurdumyzyň gazananlaryny şöhratlandyrýan dabaraly aýdym-sazlar ýaňlandy. Aşgabatlylar täze öýleriň eýelerini gutladylar, ajaýyp enjamlaşdyrylan, estetiki taýdan özüne çekiji söwda nokatlary bilen gyzyklanyp tanyşdylar.
Açylyş dabaralary mynasybetli geçirilen çärelere Türkmenistanyň ministrlikleriniň we edaralarynyň ýolbaşçylary, Mejlisiň deputatlary, Umumymilli «Galkynyş» hereketine girýän jemgyýetçilik guramalarynyň wekilleri, hormatly ýaşulular gatnaşdylar.
Türkmenistanyň maldarçylyk paýdarlar jemgyýetleriniň «Türkmenmallary» assosiasiýasynyň 12 gatly 72 öýli ak mermere beslenen ajaýyp binasy Atatürk köçesiniň ugrunda peýda boldy. Bu ýerde, Köpetdagyň eteginde—şäheriň günorta etrabynda, ýaşaýyş jaýlarynyň täze binagärlik toplumynyň emele gelýän ýerinde täze belent jaýlar yzly-yzyna ulanmaga berilýär. Işleriň depgini birjik-de gowşamaýar. Bu gün täze jaý toýlarynda ýaňlanan baýramçylyk aýdym-sazlary hem-de ýakynda ýerleşýän gurluşyk meýdançalarynyň güwwüldisi goşulyşyp, täze Galkynyş we beýik özgertmeler eýýamynda biziň halkymyzyň döredijilikli zähmetiniň dabaralanmagyny alamatlandyrdy.
Häzirki zaman «Çarwadar» söwda merkezi paýtagtymyzyň söwda we hyzmatlar ulgamyna degişli desgalaryň üstüni ýetirdi. Türkmenistanyň maldarçylyk paýdarlar jemgyýetleriniň «Türkmenmallary» assosiasiýasynyň buýurmasy boýunça we onuň serişdeleriniň hasabyna gurlan 4 gatly täze bina Aşgabat şäheriniň günorta-günbatar böleginde, Garaşsyzlyk şaýolunyň ugrunda belende galdy. Söwda toplumy ak mermere büreldi. Taslamanyň binagärlik—meýilnamalaşdyryş çözgüdi şäher landşaftynyň aýratynlyklaryny nazara aldy: Bu ýerde şaýoluň ugry günbatara tarap öwrülýär we söwda merkeziniň birsydyrgyn binalary şaýoluň gyrasyny jähekleýär.
Umumy meýdany 9 müň metrden gowrak bolan bina iki jaýdan ybaratdyr Jaýlar öz arasynda iki gatly galereýa-geçelge bilen birleşip, onuň birinji gatynyň içinden göni geçip bolýar. Geçelgäniň penjirelerinden gözel şaýollaryň biriniň ajaýyp görnüşi açylýar—galereýanyň amaly maksady hem bar. Goňşy jaýyň ýokarky gatlaryna geçmek isleýän adamlara munuň üçin aşak düşmegiň zerurlygy bolmaz.
Söwda toplumynyň uly zallarynda dükanlaryň köp sanlysy ýerleşdirildi. Birinji gatyň iň uly zaly gastranom dükany üçin bölünip berildi, onda alyjylara ýokary hilli et önümlerinden başlap, tagamly nygmatlara çenli önümleriň dürli görnüşleri hödürlenýär. Uniwermagyň ýokarky gatlarynda mebel, haly, zoologiýa, çagalar dünýäsi dükanlary ýerleşdirildi.
Bitarap Türkmenistan şaýoly soňky döwürde öz ugrunda täze gurulýan desgalaryň sany boýunça paýtagtymyzyň şaýollarynyň arasynda öňdeligi eýeleýär, örän çalt we okgunly özgerýär welin, diňe hünärmenler bu ýerde gurlan jaýlaryň we söwda merkezleriniň takyk sanyny aýdyp bilerler. Olaryň sanlary tiz-tizden üýtgeýär. Şaýoluň ugrunda gurlan ýaşaýyş jaýlary bilen durmuş infrastrukturasyna degişli desgalaryň üsti şu gün söwda merkezleriniň birbada dördüsi we otaglarynyň ýerleşişi gowulandyrylan jaýlaryň dördüsi bilen ýetirildi.
Bitarap Türkmenistan şaýolunyň günorta böleginde Türkmenistanyň «Senagat» paýdarlar-täjirçilik banky täze ýaşaýyş jaýynyň we 3 gatly söwda merkezleriniň ikisiniň açylyş dabaralaryny geçirdi. Paýtagtymyzyň bu etraby gözüň alnynda diýen ýaly okgunly özgerýär. Ýokary amatlykly ýaşaýyş jaýlary bu ýerde durmuş maksatly desgalar bilen goňşuçylykda ýerleşýär. Bular doly derejede täze binalara hem degişlidir. Owadan belent ýaşaýyş jaýy iki tarapynda gurlan «Akpamyk» we «Bugdaýly» söwda merkezleri bilen bilelikde paýtagtymyzyň görküne görk goşýar. Söwda merkezleriniň birinjisi süýt önümleriniň söwdasyna ýöriteleşdirilip, önümleriň sanawynda süýdüň, gatygyň, dorogyň, gaýmagyň, ýogurtlaryň we peýnirleriň dürli görnüşleri bar, ikinji merkeziň tekjeleri bolsa çörek we aş önümleriniň dürli görnüşleri bilen dolduryldy.
Türkmenistanyň aragatnaşyk we demirýol ulaglary ministrlikleriniň 144 öýli jaýy özüniň aýlawly, monumental keşbi bilen şaýoluň merkezi böleginiň görküne görk goşýar. Bu ajaýyp jaý milli şähergurluşyk däpleriniň we häzirki zaman inżenerçilik pikiriniň nazara alynmagy bilen guruldy. Onuň hem iki tarapynda söwda merkezleri peýda boldy. «Kerwen» demirýol edarasynyň buýurmasy boýunça gurlan bolsa, «Şöhle» Aragatnaşyk ministrliginiň buýurmasy boýunça bina edildi. Bu ýerde, Bitarap Türkmenistan şaýolunyň ugrunda şeýle hem Türkmenistanyň Baş döwlet salgyt gullugynyň täze gurlan belent ýaşaýyş jaýynyň açylyş dabarasy boldy.
Bitarap Türkmenistan şaýolunyň demirgazyk bölegi hem bu gün köp adamly boldy. Bu ýerde Türkmenistanyň «Prezidentbank» döwlet täjirçilik bankynyň 4 gatly, 36 öýli ýaşaýyş jaýy ulanmaga berildi. Beýleki jaýlaryň hemmesinde bolşy ýaly, bu täze jaýa göçüp gelenler hem ähli häzirki zaman amatlyklara, şol sanda durmuş tehnikasynyň toplumyna, howa-gözegçilik, kabelli telewideniýe ulgamlaryna, ýerasty garaża eýe boldular. Täze gurlan jaýlaryň her biriniň ýanynda çagalar üçin meýdançaylar we umumy çäreleri geçirmek üçin ýerler enjamlaşdyryldy. Jaýlaryň ýanaşyk ýerleri abadanlaşdyryldy we gök baglyga büreldi, olara eltýän ýollar çekildi.
Ertir şäheriň şaýollary ýene-de köp adamly we şowhunly bolar. Baýramçylygyň öňýanynda ulanmaga berilýän täze desgalaryň açylyş dabaralary dowam edýär.
Daşoguz, 23-nji oktýabr. S.A.Nyýazow adykdaky etrabyň «Şatlyk» daýhan birleşiginiň körpeleri Türkmenistanyň garaşsyzlygynyň 19 ýyllygyna ajaýyp sowgat aldylar. «Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň durmuş-ýaşaýyş şertlerini düýpli özgertmek boýunça 2020-nji ýyla çenli döwür üçin Milli maksatnamasyny» amala aşyrmagyň çäklerinde «Daşoguzgurluşyk» önümçilik birleşiginiň 6-njy göçme mehanizmleşdirilen toparynyň gurluşykçylary tarapyndan 90 orunlyk çagalar bagy guruldy.
Täze çagalar bagynyň açylyş dabarasyna Daşoguz welaýatynyň häkimliginiň we S.A.Nyýazow adyndaky etrabyň häkimliginiň, zähmetkeşler toparlarynyň, jemgyýetçilik guramalarynyň wekilleri, hormatly ýaşulular gatnaşdylar.
Häzirki zaman binagärliginiň 2 gatly jaýy öz taslamasy we zerur bolan enjamlar bilen üpjünçiligiň göz öňünde tutulan derejesi boýunça biziň ýurdumyzda şuňa meňzeş maksatly desgalara bildirilýän ýokary talaplara doly gabat gelýär. «Älemgoşar» diýen öwüşginli ada eýe bolan täze çagalar bagy 5 topara niýetlenendir. Olaryň her biri oňaýly ýatylýan otaglardan başga-da, okuw okamak we oýun oýnamak üçin giň otaglar, suwa düşülýän otaglar bilen üpjün edildi. Bu ýerde körpeleriň wagtyny peýdaly we oňaýly geçirmegi üçin häzirki zaman durmuş tehnikasy bilen üpjün edilen naharhana we kir ýuwulýan bölüm, aýdym-saz zaly we çagalaryň döredijiligi üçin niýetlenen otag, kompýuter otagy we beýlekiler bar. Çagalar bagynyň abadanlaşdyrylan çägine şeýle hem sport we oýun meýdançalary, tomusky bag girýär.
Täze çagalar bagy ýyladyşyň, energiýa we suw üpjünçiliginiň özbaşdak ulgamlaryna hem eýedir. Mahlasy, bu ýerde ähli zat, körpeler üçin kiçi maneżlerden başlap, uly toparyň täze oňaýly partalaryna çenli zatlar çagalar baradaky aladanyň birjik-de ünsden düşürilmeýändigini görkezýär.
S.A.Nyýazow adyndaky etrabyň «Şatlyk» daýhan birleşiginde gurlan çagalar bagy ýaly, ýurdumyz boýunça mekdebe çenli çagalar edaralarynyň açylmagy—döwletiň ösüp gelýän nesil baradaky aladasynyň, bilim ulgamyny düýpli özgertmegiň üstünlikli geçirilmeginiň nobatdaky aýdyň subutnamasydyr. Türkmenistanyň Prezidenti Gurbanguly Berdimuhamedow şol özgertmeleriň başyny başlady.
Dabaralar tamamlanandan soň, şanly wakalar mynasybetli, Watanymyzyň gülläp ösmeginiň hatyrasyna hem-de milletiň Lideriniň baş saglygyna sadakalar berildi.
Aşgabat, 24-nji oktýabr. Türkmen paýtagtynda Türkmenistanyň garaşsyzlygynyň 19 ýyllygyna gabatlanan täze desgalaryň açylyş dabaralary dowam edýär. Şu gün şäheriň dürli künjeklerinde birnäçe ýokary amatlykly ýaşaýyş jaýlaryny ulanmaga bermegiň dabaraly çäreleri geçirildi.
Bu dabaralar hakyky baýramçylyga öwrüldi, täze Galkynyş eýýamyny wasp edýän aýdym-sazlar ýaňlandy. Täze binalaryň her birini dürli reňkdäki lentalar hem-de howa şarlary bezedi. Dabaralara ministrlikleriň we edaralaryň, şäher häkimliginiň, Umumymilli «Galkynyş» hereketine girýän jemgyýetçilik guramalaryň wekilleri, gurluşykçylar, köp sanly aşgabatlylar hem-de bu gün otaglarynyň ýerleşişi gowulandyrylan oňaýly öýleriň açarlaryny alan bagtly jaý eýeleri gatnaşdylar.
Paýtagtyň şähergurluşyk keşbindäki özgerişlikler ajaýypdyr. Atatürk köçesi günsaýyn gözelleşýär. Şu gün onuň günorta böleginde «Türkmenhowaýollary» döwlet milli gullugynyň buýurmasy boýunça gurlan täze 12 gatly jaý ýaşaýjylar üçin öz gapylaryny giňden açdy. Granit we mermer bilen örtülen ajaýyp binada üç, dört we bäş otagly öýleriň 72-si bar. Olaryň hemmesi zerur bolan oňaýlyklaryň doly sanawyna eýedir.
Täze binalary ulanmaga bermegiň dabaralary Bitarap Türkmenistan şaýolunda dowam etdi. Ol binalaryň özboluşly taslamalary hem-de häzirki zaman binagärlik—meýilnamalaşdyryş çözgüdi netijesinde şäheriň görküne görk goşdy. Bu ýerde Türkmenistanyň Azyk senagaty assosiasiýasynyň buýurmasy boýunça gurlan 12 gatly, 105 öýli ýaşaýyş jaý dabaraly ýagdaýda ulanmaga berildi. Ak mermere beslenen jaý özüniň gaýtalanmajak binagärlik gurluşy bilen tapawutlanýar. Bu jaý gürrüňsiz, şaýoluň günorta böleginiň hakyky bezegine öwrüler. Onuň golaýynda durmuş infrastrukturasynyň täze desgalarynyň—häzirki zaman multimediýa mekdebiniň we çagalar bagynyň gurluşygynyň tamamlanyp barýandygy bellärliklidir.
Bu şaýoluň ugrunda durmuş maksatly desgalary ulanmaga bermegiň ýene bir dabaraly çäresi boldy. Demirýol ulaglary ministrliginiň buýurmasy boýunça gurlan ýokary amatlykly jaýlaryň ikisi täze öý eýelerine tabşyryldy. Binalar Bitarap Türkmenistan şaýolunyň demirgazyk böleginde guruldy, bu ýerde 4 gatly ak mermerli binalaryň toplumy emele geldi. Şäheriň bu künjegi düýbünden özgerdi we aýratyn keşbe eýe boldy. Paýtagtyň aeroportundan Köpetdagyň etegine çenli tutuş şäheri kesip geçýän Bitarap Türkmenistan şaýoly onuň içinden eriş-argaç bolup geçdi. Bu şaýol häzir şäherde möhüm ýollaryň birine öwrülip, öz ugrunda häzirki zaman binalarynyň we ýol hereketiniň nusgasyny döredýär.
Täze jaý toýlaryny Türkmenistanyň döwlet balyk hojalygy komitetiniň buýurmasy boýunça gurlan 12 gatly, 48 öýli jaýyň açylyş dabarasy dowam etdirdi. Belent ak mermerli jaý 10 ýyl abadançylyk we Ankara köçeleriniň kesişýän ýerinde guruldy, ol Garaşsyzlyk seýilgähinden gündogarlygyna uzaýan ýokary amatlykly jaýlaryň toplumyna sazlaşykly goşuldy. Edaranyň işgärleri zerur bolan durmuş tehnikasy, mebeller, otaglarda oňaýly howany saklaýan ulgamlar bilen üpjün edilen giň öýleriň bagtly eýeleri boldular.
Taslama laýyklykda täze jaýy bedenterbiýe—sagaldyş toplumy bilen bilelikde gurdular, onda sport bilen meşgullanmak üçin zerur bolan şertler döredildi. Toplumda suwda ýüzülýän gyşky howuz, birnäçe türgenleşik zallary, suwda düşülýän otaglar, şeýle hem açyk sport meýdançalary bar.
Şäheriň dürli künjeklerinde geçirilen täze binalaryň açylyş dabaralary türkmen paýtagtynyň pajarlap ösýändigini görkezýär. Ak şäher çäklerini giňeldýär, täze kaşaň ýaşaýyş jaý toplumlary bilen gözelleşýär. Täze jaý eýeleriniň ýüzlerçesi häzirki zaman, otaglarynyň ýerleşişi gowulandyrylan binalaryň öýlerinden açarlary aldylar, ýurdumyzda täze gurulýan ýaşaýyş jaýlary täze mebeller bilen üpjün edilip, howany salkynladyjy we tämizleýji, kabelli telewideniýe ulgamlaryna birikdirildi. Täze jaý eýeleriniň ygtyýarynda giň ammar jaýlary we ýerasty awtoduralgalary bar.
Häzirki zaman ýaşaýyş jaýlarynyň ulanmaga berilmegi—täze Galkynyş eýýamynyň we türkmen döwletiniň Baştutany Gurbanguly Berdimuhamedowyň başyny başlan beýik özgertmeleriniň baş şygary bolan «Döwlet adam üçindir!» diýen ýörelgäni durmuşa geçirmegiň jähetleriniň biridir.
Täze desgalaryň açylyş dabaralarynyň her biri hakyky baýramçylyga öwrüldi. Täze ýaşaýyş jaýlaryny ulanmaga bermegiň dabaralary tamamlanandan soň, garaşsyz Watanymyzyň gülläp ösmeginiň hatyrasyna we Türkmenistanyň Prezidenti Gurbanguly Berdimuhamedowyň baş saglygyna sadakalar berildi.
referans: www.turkmenistan.gov.tm