2017-nji ýylyň 7-nji iýunynda Türkiýäniň Ankara şäherinde Türkmenistanyň Türkiýe Respublikasyndaky Ilçihanasy tarapyndan Türkiýäniň Ýaşlar we sport ministrligi bilen bilelikde agzalan ministrligiň maslahatlar zalynda «2017-nji ýylyň sentýabr aýynda Aşgabat şäherinde geçiriljek Ýapyk binalarda we söweş sungaty boýunça V Aziýa oýunlarynyň tanyşdyrylyşy» atly maslahat we sergi geçirildi.
Maslahata Türkiýäniň Ýaşlar we sport ministriniň orunbasary Abdurrahim Boynukalyn we ministrligiň müdirlik başlyklary, Türkiýäniň basketbol, wolleýbol, bowling, boks federasiýalarynyň ýolbaşçylary we wekilleri, Türkiýäniň sport guramalarynyň wekilleri, Türkiýäniň Beýik Millet Mejlisiniň käbir deputatlary, Aziada-2017-ä gatnaşjak döwletleriň birnäçesiniň Ilçileri, Ankara şäherinde ýerleşýän halkara guramalarynyň wekilleri, Türkmenistanda iş alyp barýan türk kompaniýalarynyň wekilleri, Türk medeniýetiniň halkara guramasynyň (TÜRKSOÝ) ýolbaşçylary, Türkmenistan-Türkiýe dostluk jemgyýetiniň agzalary, ýokary okuw jaýlarynyň professor-mugallymlary we bilermenleri, köpçülikleýin habar beriş serişdeleriniň wekilleri hem-de Türkiýe Respublikasynda işleýän we bilim alýan Türkmenistanyň raýatlary gatnaşdylar.
Maslahatyň dowamynda Türkmenistanyň Türkiýedäki Ilçisi I.Amanlyýew, Türkmenistanyň Sport baradaky döwlet komitetiniň başlygynyň orunbasary M.Nasyrow, Türkiýäniň Ýaşlar we sport ministriniň orunbasary Abdurrahim Boynukalyn, “Polimeks” türk kompaniýasynyň Baş müdiriniň orunbasary Gülün Şaýlan Seýmen, Türkiýäniň Premýer-ministrliginiň Habarlar müdirliginiň wekili Jesurhan Taş hem-de uniwersitetleriň professorlary we beýlekiler çykyş etdiler.
Maslahatyň dowamynda Çuňňur hormatlanylýan Prezidentimiziň baştutanlygynda ýurdumyzda alnyp barylýan sport döwlet syýasaty, sport ulgamyny ösdürmek babatda ýurdumyzda amala aşyrylýan işler, döwletimiziň sport babatda halkara hyzmatdaşlygyny ösdürmek boýunça durmuşa geçirýän çäreleri, Aziada-2017-niň Türkmenistanda geçirilmeginiň milli, sebit we halkara derejelerdäki ähmiýeti, agzalan oýunlaryň döwletimiziň derejesine we türkmen milligine laýyk we mahsus görnüşde geçirilmegi ugrunda Çuňňur hormatlanylýan Prezidentimiziň liderliginde ýurdumyzda we daşary ýurtlarda amala aşyrylýan çäreler we beýlekiler barada bellenip geçildi.
Şeýle hem, Hormatly Prezidentimiziň başlangyçlary bilen sportuň we bedenterbiýäniň ösdürilmegi döwlet syýasatynyň ileri tutulýan ugurlarynyň biri hökmünde saýlanyp alnandygy, 2017-nji ýylyň Sagdynlygyň we ruhubelentligiň ýyly diýlip yglan edilendigi, Aziýa oýunlarynyň ýurdumyzyň halkara abraýyny has-da artdyrmakda möhüm orun eýelejekdigi barada beýan edildi.
Hususan-da, 2017-nji ýylda geçiriljek Aziýa oýunlaryna Okeaniýa ýurtlary bilen birlikde jemi 64 ýurduň milli ýygyndylarynyň gatnaşjakdygy şeýle hem bosgun türgenleriň toparynyň Aziýa Olimpiýa Geňeşiniň baýdagynyň astynda gatnaşmaklarynyň göz öňünde tutulýandygy barada maslahata gatnaşyjylara ýetirildi.
Türkiýäniň Ýaşlar we sport ministrliginiň Sergi zalynda guralan sergide Aziada-2017-ä uly orun berildi. Sergide Çuňňur hormatlanylýan Prezidentimiziň kitaplary, türkmen ýazyjylarynyň we şahyrlarynyň eserleri, Türkmenistan baradaky žurnallar, Ýapyk binalarda we söweş sungaty boýunça V Aziýa oýunlarynyň nyşanlary şekillendirilen dokma önümleri, türkmen milli lybaslary we şaý-sepleri görkezildi.
Çeşme: turkey.tmembassy.gov.tm