Türkmenistanda geçirilýän Sagdynlyk we bagtyýarlyk atly köpçülikleýin bedenterbiýe-sport we sagdyn durmuş-medeni çäreleriň biraýlygy mynasybetli şu gün Hojambaz etrabynyň Beşir obasynda 365 orunlyk döwrebap sport mekdebi açyldy.
Täze desganyň açylyş dabarasyna obanyň ýaşaýjylary hem-de bu ajaýyp sowgat mynasybetli oba ýaşlaryny gutlamaga gelen köpsanly myhmanlar gatnaşdylar. Döwrebap gurluşyk materiallaryny we tehnologiýalary ulanmak arkaly ýerli hususy kärhananyň gurluşykçylary tarapyndan bina edilen ajaýyp sport merkeziniň binasy obanyň özboluşly bezegine öwrüldi.
Sport şäherjigi baýramçylyk lybasyna beslenipdir. Berkarar döwletimiziň bagtyýarlyk döwrüniň beýikligini wasp edýän aýdym-sazlar ýaňlanýar, tans toparlary çykyş edýärler, ýaş türgenler öz ussatlygyny görkezýärler. Dabarada çykyş edenler sporty we köpçülikleýin bedenterbiýe-sagaldyş hereketini ösdürmegiň, jemgyýetde sagdyn durmuş ýörelgelerini berkarar etmegiň milli Liderimiz Gurbanguly Berdimuhamedowyň durmuşa geçirýän döwlet syýasatynyň ileri tutulýan ugurlarynyň biridigini aýratyn bellediler. Dabara gatnaşyjylar halkymyzyň saglygyny berkitmek, döwrebap maddy-enjamlaýyn binýadyň esasynda bedenterbiýäni we sporty ösdürmek barada edýän aladasy üçin döwlet Baştutanymyza tüýs ýürekden hoşallyk bildirdiler.
Obadaky täze sport toplumynda diňe bir ýaşlaryň däl, eýsem sagdyn durmuş ýörelgesine eýerýän uly ýaşly adamlaryň hem sport ussatlygyny ýokarlandyrmagy üçin ähli şertler döredildi. Çagalara we ýetginjeklere sportuň dürli görnüşleri boýunça tälim bermek, olaryň işjeň dynç almagy hem-de boş wagtlaryny gyzykly we peýdaly geçirmegi üçin ähli mümkinçilikler göz öňünde tutuldy. Sport zallary döwrebap trenažorlar, sport enjamlary we abzallary bilen üpjün edildi. Ýylyň islendik paslynda sport mekdebinde basketbol, woleýbol, gimnastika, tennis, göreş, küşt we sportuň beýleki görnüşleri bilen meşgullanyp bolýar. Bu ýerde sportuň köp görnüşleri boýunça köpçülikleýin ýaryşlary geçirmek üçin hem ähli şertler döredilipdir.
Eşik çalşyrylýan, suwa düşülýän, dynç alynýan, lukmançylyk otaglary türgenleriň hyzmatyndadyr. Bu ýerde tälimçiler we eminler üçin hem otaglar göz öňünde tutulypdyr. Howany çalşyş ulgamy bolsa otaglarda oňaýly ýylylygy saklamaga mümkinçilik berýär. Özbaşdak suw, energiýa we ýylylyk üpjünçiligi ulgamlary işleýär.
Sport mekdebiniň göwnejaý abadanlaşdyrylan, bag ekilen we yşyklandyrylan çäginde oňat enjamlaşdyrylan sport şäherjigi ýerleşýär. Onda futbol, woleýbol, basketbol, tennis meýdançalary, ylgaw ýodajyklary bar.
Oba sport merkeziniň açylan güni onuň zallarynda we meýdançalarda sportuň dürli görnüşleri boýunça gyzykly ýaryşlar geçirildi. Dabarada täze desganyň gurluşygynda tapawutlanyp işlän gurluşykçylara gymmat bahaly sowgatlar gowşuryldy.
* * *
Şu gün Gökdepe etrabynyň Täze eýýam obasynda ýerli hususy gurluşyk kärhanasynyň hünärmenleri tarapyndan gurlan täze çagalar bagynyň açylyş dabarasy boldy.
160 orunlyk iki gatly çagalar bagynyň binasy öňdebaryjy tehnologiýalary nazara almak bilen özboluşly binagärlik keşbinde guruldy we durmuş maksatly desgalara bildirilýän ähli talaplara doly laýyk gelýär. Täze desga welaýatyň häzirki döwürde okgunly ösýän we barha gözelleşýän obalarynyň özboluşly bezegine öwrüldi.
Täze çagalar şäherjiginde körpeleriň döredijilik we beden taýdan sazlaşykly ösmegi üçin ähli zerur şertler döredildi. Giň binalaryň üçüsiniň hem içi döwrebap bezeldi. Olarda naharhana, oýun otaglary, owadan we amatly mebelli ýatakhanalar ýerleşýär. Okuw otaglary bolsa döwrebap enjamlar bilen üpjün edildi. Körpeler olarda dürli sapaklary özleşdirerler, kompýuterde işlemegi, ene dilini hem-de daşary ýurt dillerini öwrenerler.
Häzirki döwrüň ýokary talaplaryna laýyklykda, aýdym-saz we tans otaglary, sport hem-de oýun meýdançalary döwrebap enjamlaşdyryldy. çagalar bagynyň binalarynda şeýle hem aşhana, lukmançylyk otagy, kir ýuwulýan we ütük edilýän otaglar ýerleşýär.
Mekdep ýaşyna çenli çagalar edarasynyň ýanaşyk ýerleri doly abadanlaşdyryldy we bagy-bossanlyga öwrüldi, dynç almak, dürli çäreleri geçirmek hem-de açyk asmanyň astynda sapaklary geçirmek üçin özboluşly desgalar guruldy. Bu ýerde oňaýly oturgyçlar, çyra sütünleri ornaşdyryldy, ähli ýerde ýaprakly we pürli agaçlaryň ýaş nahallary oturdyldy hem-de bezeg gülleri ekildi.
Täze çagalar bagynyň açylyş dabarasyna welaýat we etrap häkimlikleriniň, jemgyýetçilik guramalarynyň wekilleri, hormatly ýaşulular, ýaşlar, köpsanly oba ýaşaýjylary, şeýle hem desgany bina eden gurluşykçylar gatnaşdylar. Has tapawutlanyp işlän gurluşykçylara gymmat bahaly sowgatlar gowşuryldy.
Dabara gatnaşyjylaryň nygtaýşy ýaly, “Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň durmuş-ýaşaýyş şertlerini özgertmek boýunça 2020-nji ýyla çenli döwür üçin Milli maksatnamasyny” durmuşa geçirmegiň çäklerinde ýurdumyzyň ähli künjeklerinde möhüm durmuş maksatly desgalaryň, şol sanda döwrebap çagalar baglarynyň gurluşygy giňden ýaýbaňlandyryldy. Olar halkymyzyň abadançylygy we ata Watanymyzyň gülläp ösmegi barada yzygiderli alada edýändigi üçin milli Liderimize tüýs ýürekden hoşallyk bildirdiler.