Stambul şäherinde geçirilen Halkara türk açyk karate ýaryşynda söweş sungatynyň türkmen ussatlary nobatdaky üstünlige eýe boldular. Biziň ýurdumyzyň sportda gazanan üstünlikleriniň üsti bir kümüş we bäş sany bürünç medallar bilen ýetirildi.
Türkiýede geçirilen ýaryşa gatnaşmak üçin dünýäniň 38 döwletinden ýygyndy toparlar dürli ýaş toparlaryna wekilçilik edýän türgenleriň 2 müňe golaýy gatnaşdylar. Birnäçe günüň dowamynda Halkara ýaryşa gatnaşyjylar bäsleşiklerde, şeýle hem toplumlaýyn maşklarda medallar ugrunda bäsleşdiler.
Türkmen türgeni Eziz Ýaňybaýew 12-13 ýaşly türgenleriň toparynda çykyş edip, kümüş medala mynasyp boldy. Bürünç medaly biziň toparymyza Zöhre Jumabaýewa getirdi (18 ýaşdan uly ussatlar topary). Kata görnüşi boýunça toplumlaýyn maşklarda uly ýaşly türgenleriň arasynda Diýar Hojaýew, Gurbanmyrat Gylyjow we Begmyrat Japbarow bürünç medallara mynasyp boldular. Şu ýaş toparynda adaty karateniň şahsy kata görnüşi boýunça üçünji orna we bürünç medala Atabaý Atabaýew mynasyp boldy.
Ýekelikdäki toplumlaýyn maşklarda bürünç medallaryň ýene-de ikisini Türkmenistanyň Adaty karate boýunça Milli merkeziniň başlygy Hangeldi Hojaýew hem-de Milli ýygyndy toparyň baş tälimçisi Arazdurdy Elliýew gazandylar, olar söweş sungatlarynyň bu görnüşleriniň uly ýaşly weteranlarynyň toparynda çykyş etdiler.