Türkmen paýtagtynda “Dostluk” Kubogy ugrunda ýetginjekleriň arasynda futbol bäsleşiginiň hasap boýunça däbe öwrülen 11-nji oýunlary tamamlandy. Hormatly baýrak, şonuň bilen bilelikde altyn, kümüş we bürünç medallar ugrunda ýurdumyzyň ähli welaýatlaryndan we Aşgabat şäherinden toparlaryň 8-si bäsleşdi.
Deslapky tapgyrda bäsleşige gatnaşyjylar iki topara bölündiler. Şolardan iň gowularyň ikisi ýarym finala çykdylar, şolaryň ýeňijileri bolsa finalda baş baýrak ugrunda bäsleşdiler, ýeňlişe sezewar bolanlaryň başa-baş bäsleşiginde bolsa bürünç medalyň eýesi kesgitlendi.
“Köpetdag” stadionynda aýgytlaýjy oýunda “Ahal” we “Balkan” toparlary duşuşdylar. Hasaby oýnuň 9-njy minutynda “Balkan” toparynyň oýunçysy Ş.Şaýyrdanow açdy. Oýnuň 48-nji minutynda bolsa “Ahalyň” oýunçysy S.Gurbanberdiýew jogap pökgüsini geçirdi, şeýlelikde oýnuň esasy wagty 1:1 hasabynda deňme-deňlige tamamlandy.
Baş baýrak ugrunda göreşi bäsdeşler 11 metrlik jerime urgular tapgyrynda dowam etmeli boldular. Ýöne bu ýerde hem soňky wakalaryň görkezilişi ýaly, Kubogynyň eýesiniň kesgitlemek aňsat bolmady. 3:3 hasabynda tamamlanan ilkinji urgular tapgyryndan soň, toparlaryň ikisi hem birmeňzeş netije görkezdiler. Diňe 16-njy urgudan soň, ýeňiji kesgitlendi. “Balkan” topary bu tapgyrda güýçli bolup çykdy, ol 5:4 hasabynda ilkinji gezek ýeňş gazandy. Bu ýeňşe topary onuň O.Kowusowdan we B.Durdyýewden ybarat türgenleşdirijiler düzümi getirdi.
Üçünji orun ugrunda Syýahatçylyk we sport baradaky döwlet komitetiniň çagalar-ýetginjekler olimpiýa rezerwiniň sport mekdebiniň futbolçylary “Mary” toparyndan bolan ýaşytdaşlaryndan 5:0 hasabynda üstün çykyp, bürünç medalyň eýesi boldular.
Bäsleşigiň ýapylyş dabarasynda ýeňijiler “Dostluk” Kubogyna we altyn medallara mynasyp boldular. Mundan başga-da, bäsleşige gatnaşyjy ähli toparlara pul baýraklary gowşuryldy.
referans: www.turkmenistan.gov.tm