Duşenbe güni, ýagny, türkmen milli göreşi sport ugry boýunça geçirilen ikinji we soňky ýaryş gününiň netijeleri Türkmenistanyň bu sport ugrunda saýlanýandygyny doly subut etdi. Ýapyk binalarda we söweş sungaty boýunça V Aziýa oýunlarynyň çäginde erkekleriň hem-de zenanlaryň arasynda türkmen milli göreşiniň nusgawy görnüşi boýunça 19 göreşijiniň çykyş etmeginde Türkmenistan 13 sany altyn medal gazanmak bilen, jemi 23 sany medal gazanan pälwanlaryna türkmen halkynyň buýsanmaga doly haky bardyr.
Rejepaly Orazalyýew türkmen milli göreşi boýunça bu gün ilkinji altyn medaly gazanan türgendir. Ol garşydaşy Jepbar Atamämmedowy erkekleriň arasynda 100 kilogramdan ýokary agyrlyk derejesinde nusgawy görnüşde tutluşyp, şenbe güni geçirilen ilkinji tapgyrda gazanylan 10 sany altyn medalyň üstüne ýene-de birini goşdy.
75 kg, 68 kg, 62 kg hem-de 57 kg-a çenli agyrlyk derejelerinde hem türkmen pälwanlary altyn medallaryň eýesi bolmagy başardy.
20 ýaşly Türkmenistanly Jahan Muhammedowa iň soňky bolup tutluşmaga çykdy. 25 ýaşly Mongoliýaly Mýamtuýa Nýamkhu bilen garşylaşmagy bilen, 70 kilogramdan ýokary agyrlyk derejesinde hem Türkmenistana altyn medal getirmek jogapkärçiligi Jahanyň boýnundady. Türkmen göreşiji zenany garşydaşyny göterip, ýaryş düşekçesine zyňanynda bolsa, Türkmenistanyň bu agyrlyk derejesinde hem ýeňiji bolandygynyň alamaty boldy.
Türkmenistanly tomaşaçylar şu gün Sportuň oýun görnüşleriniň toplumynda (MIA) geçirilip başlanjak guşakly göreş ýaryşlarynda hem türkmen türgenleriniň aglaba medallaryň eýesi boljakdygyna ynam bilen garaşýarlar.